錢，真係好污糟！有報告話，連酒吧裝Nuts個碗、巴士與地鐵嘅扶手、甚至係公廁，都乾淨過一張銀紙！
個報告話，銀紙通常用紙或棉麻混紡製成，表面充滿纖維與細孔，係細菌繁殖最佳溫床，仲話銀紙表面有成93種細菌潛伏。
覺得毛管戙？報告仲話，一張銀紙一日平均會被4.6對手摸過，如果第一個人患咗感冒，最後摸嗰位就有四分之一機會被傳染。
仲未止，個報告又話，Cash係唔記名又無法追蹤，所以成為地下經濟命脈、非法交易時首選貨幣。
未完，報告再話，喺一四年全球就有2,000億張銀紙流通市面，不過要焚化處理啲損壞舊鈔時就製造約307萬公噸二氧化碳幾咁唔環保咁咁咁，總之又黑暗又污糟連「離世」都要累街坊咁啦……咁驚嚇？
嗱，其實呢個報告係MasterCard做嘅。佢哋嘅結論？當然係叫大家下次消費改用卡囉。絲絲嘅結論係咁嫌錢污糟嘅話，洗吓佢或者使咗佢囉。
余絲韻