理財Campus：兩代少年股神 炒出投資真理

80後洪龍荃 進身專家 揸兩層樓

現年28歲的洪龍荃（Larry），早年與投資結緣，只因中四暑假時百無聊賴，受經濟科教師「慫恿」，膽粗粗參加投資比賽，雖對投資一竅不通，豈知初出茅廬即贏得全場總冠軍，自此與投資結下不解緣，家人見其天分，亦傳授投資秘技。

目前擔任分析員的Larry與一般投資初哥無異，投資路上非一帆風順，起初更見股票眾多而無從入手。當時的他先從消費股下手。「始終消費股門市會喺香港街邊見到，自己會較熟悉同有興趣。」

經幾年苦練，日夜拜讀經典，Larry終在18歲修成下山，開設首個投資戶口，由爺爺和嫲嫲打本30萬元，加上父親、叔父在旁「加持」，投資僅年餘，便賺得人生首個100萬元，即使遇上○八年金融海嘯，亦能賺錢全身而退，往後每年回報率俱達雙位數，不枉少年股神美譽。

劉勝鈞每日花近一小時翻閱全球政經新聞。

少年股神投資戰績

惟他坦言：「以前其實易玩好多，成個市場主要係香港投資者，依家個市難睇好多，太多唔同Player參與，多咗好多魚係魚塘。」

損手悟巴菲特理論

上得山多終遇虎，Larry縱然萬般謹慎，亦有失手之時。○六年時，他誤信市場消息，指內地電訊市場發展勢頭好，大手購入晨訊科技（02000），不料股價下挫，他心中躊躇，想起股神巴菲特金句「若對股票有信心，應愈跌愈買」，惜股神沒有顯靈，該公司發盈警，股價暴跌，最終損手近半離場，始知投資不能盡信人言。「之後咪知道睇書係唔可以100%照跟，股神咁講，係因為佢對股票了解到爆。」他說。

回顧過去，Larry稱，以前投資太倚重個人感覺，即使有分析，但只是財務報表中的「大數」，如盈利增長等。現時則不同，進身專業投資者後，Larry着重拆解公司多年業績，解構成本如何影響盈利等不同數據，以連鎖化妝店為例，數據精準至門市每呎能賺多少錢。

憑藉一個比賽改變命運，Larry已由昔日的少年股神蛻變成專業投資者，兩年前更成功上車，以500萬元購入帝后華庭一個單位，年前再與家人合資購入荃灣愉景新城一個單位，但由於現時工作繁忙，個人投資已交由家人打理。

90後劉勝鈞 6萬元起家 轉做實業

21歲的劉勝鈞（Harvey）同樣贏過投資比賽，但經歷卻截然不同。小學時，Harvey母親用其利是錢全數購入窩輪，惜輸清光，Harvey不忿，決定一邊儲錢，一邊研究投資翻本，終在中一儲夠彈藥、親身上陣。他起初只有6萬元資本，經歷六年股海搏殺，最終賺得人生首個100萬元。

他稱，在股份消息向外公布前，個人會作大方向預測及部署消息的出現，同時配合技術分析，伺機低買高沽。

不似Larry「專一」，Harvey對各行各業股票無所不窺，銀行、地產、軍工及電訊等均成其囊中物，早期投資每年回報率最少50%，後來銀碼增加後方趨保守，但平均亦有20%回報。他最風光的一役，莫過於以股價不足1元購入華晨中國（01114），並於升至4元時沽出，獲利豐厚，不過其後股價曾升逾10元，他狂揼心口。「呢啲真係冇得講，當時忍唔到手沽，邊估到最後升得咁高。」

忌迷冧巴 着重分析

Harvey每日花近一小時翻閱全球政經新聞，從而推敲各行各業興衰，他建議投資者翻報時，勿只迷戀「冧巴」，應着重中長線分析。

惟Harvey曾損失慘重。去年底市況較差時，他心郁郁炒熊證，初時大賺，頓覺飄飄然，決定一鋪重注，銀碼涉六位數字，惟錯估心理承受能力，購入熊證後正股即升，熊證帳面值至少跌20至30%，他即膽怯，「當時都知自己唔理性，但抵受唔住，所以止蝕離場」，惜老天與Harvey作對，該股中午收市時轉跌，回想若不沽出，將倒賺近10%，幾小時內心情跌宕且銀碼不小，至今想起仍猶有餘悸。

Harvey現為全職學生，已少沾手股票買賣，只因個人塑膠生意繁忙，不時往來各地洽談生意，無精神分析股市，故較少下盤。「若我唔做分析，其實同身邊師奶、阿伯冇咩分別。」