唔少人仲相信十月是傳統股災月，現實係，唔好講股災，連恒指上落幅度今個月都特別少，前日先跌後抽高後，昨日市況又再膠着，恒指埋單跌38點，收報23,565點，主板成交由周一的740億元，跌到落昨日僅554億元，縮減近四分之一。
十月期指日市收23,614點，較合理價高出48點，十一月期指更高出64點。唯一期指客可以感受到的，是大戶看來不想十月結算價走得太低。
恒指在22,978至24,364點形成橫行區，大市由22,978點低位反彈的第五日，恒指還未升抵中位的23,671點，反彈動力有限已經有目共睹。
退後一步睇，去年八月人民幣匯改急瀉，以及本年一月人民幣匯價閃跌，兩次港股也因此一瀉如注，反觀近日人民幣新一輪跌浪之中，港股表現出奇地冷靜，到底是外資接受中國匯價持續貶值？抑或有更大龍鳳，完成部署會在不日上映？
在泥漿摔角般的市況下，筆者無法確認方向，亦令近期欠缺開倉過市的意欲，怕一旦睇錯會恨錯難返。在現貨成交低迷之下，市況動態上一旦出現突破，可能相當迅速，唔想濫賭猶如買大細，惟有忍一忍手。
John Mullen