人民幣中間價連續三天創新低，嚴格而言應視之為美元強勢之下的現象，屬被動貶值。應對匯率及股市波動，最有效的做法還是多元化投資，別將所有雞蛋放在同一籃子內。
發改委話九月底鋼煤去產能已完成目標逾八成，相信年內有望提前達標。事實上，本月煤股累升不少，而鋼鐵股才剛剛有異動，可留意鞍鋼股份（00347）及馬鋼（00323）股價及交投，有機會接力炒上。
到了末季，又到基金跑年結成績表的時候，可惜兩地魚缸交投都冇咩起色，美國總統大選及加息前，大戶小戶都以觀望為主，所以要跑業績都唔係易事。不過，如果組合有龍頭科網股騰訊控股（00700），應該唔使點頭痕，事關今年以來股價升咗四成！
講到科網股，又睇睇隻IGG（00799），昨日股價逆市升6.4%，收報5.82元。IGG在八月下旬宣布中績後，便重新回購股份，股價由不到4元，反覆上升至昨日高位見5.88元。
其實，公司中期純利升半成至2,611萬美元，中期息每股4.3仙，有錢賺又有息派；現價往績市盈率24倍，息率3.6厘，論估值真係好過好多內地創業板股份，深港通唔炒呢啲炒邊啲！
暫看其股價短線在6元關前有阻力，一旦以大成交衝穿6元關，應該仲有一浸去，目標挑戰去年次季阻力位7元關，失守5.3元止蝕。
司慕渢