Market Insight：乳業股可吼位跟進

如無意外，深港通仲有唔夠一個月就開車，港股市場的科網股屆時有望獲得重估空間，且新經濟股具增長動力，值得看高一線。昨日一眾科技相關股再逆市炒高，IGG（00799）及博雅互動（00434）收市分別升6.3%及5.6%；長飛光纖光纜（06869）則有3.2%進帳。

長飛光纖謀定後動

長飛光纖為內地最大光纖預製棒、光纖、光纜和其他相關產品的供應商，上半年多賺16.3%至3.55億元人仔。內地電訊營運商正積極布局400G光網絡，明年起將踏入試商用階段，預期光纖光纜需求和價格均有望提升，加上「互聯網+」和「寬帶中國」等國家戰略，行業發展潛力可觀。

若公司周五公布季績對辦，走勢有機會進一步突破，可觀望績後表現再作部署。

零售股好淡因素並存

本地零售股昨日表現都算突出，雖然莎莎國際（00178）周一發咗盈警，不過同時公布咗十一長假期間銷售唔錯，刺激昨股價升近一成；I.T（00999）則中績轉虧為盈，帶動股價升近3%，；六福集團（00590）周一彈高一成，昨再升1.1%，呢幾隻股份昨日同創52周新高。

一眾零售股做好，係咪預示行業寒冬已過？租金回落，市場預計旅客人數見底，對零售業而言係好消息，不過睇番近幾個月數據，普遍仍未見好轉。目前業務是否真正有好轉，睇嚟仲需要觀察，特別係珠寶金飾行業。

另外，內地今個月起推行化妝品消費稅改革，普通美容、修飾類化妝品唔再收稅，高端化妝品消費稅率亦由30%下調至15%。措施實行未夠一個月，對莎莎及卓悅（00653）等的實際影響有幾大未知。

莎莎卓悅仍有優勢

不過，過往內地消費者來港買化妝品、日用品，唔單只因為價錢平，而多數係出於信心、品質的考慮，相信呢個仍然係本地企業的優勢。點都好，股價能夠持續反彈，唔多唔少反映市場態度趨樂觀，昨日見多隻股份成交均增加，短期內或有力再升一浸。

蒙牛享有龍頭效益

現代牧業（01117）近日獲多間大行唱好，瑞信最新報告認為其最壞時刻已過，將評級調高至「跑贏大市」，目標價睇2.4元；而麥格理將其評級由「跑輸大市」升至「中性」，目標價大幅調升1倍至1.74元。該股連續兩日在大成交下以大陽燭突破，昨日再升3.7%收報1.94元，短線有機會挑戰2元關口。

事實上，乳業股經歷兩年多的調整及去產能後，行業供需關係逐步改善，內地原奶價格最近已見回穩，相關企業前景未宜睇淡，作為行業龍頭的蒙牛乳業（02319）亦值得留意。

集團背靠中糧集團呢個大碼頭，擁有行業競爭優勢，而早前高層的變動亦獲得正面評價。其股價今年以來走勢呈一浪高於一浪，近日升勢重現，值得吼位跟進。

古勝