有錯就要認，難得連藍籌「鞋王」百麗國際（01880）都勇於承認輸在遲遲唔轉型，呢招苦肉計唔少大行都好Buy，無即刻出手狠削目標價。百麗老臣子、公司CEO兼執董盛百椒尋日更公開將過錯攬上身，講明公司無及時數碼化轉型，「可能是我的因素」！
盛總原本講開，數碼化轉型係公司變革主體方向，無論客戶、貨品生產環節以至業務營運管理系統，都要轉型數碼化。點知佢忽然趁機自我反省，公開自爆到現時為止，都唔慣用電腦，仲好坦白咁講話唔明白電腦嘅好處。絲絲聽到呢度，都唔知點反應好！
盛總一向屬於思考型，好似對O2O項目（O2O，Online To Offline也，即是「網上銷售帶動非網絡經營與消費」嘅電子商務模式），盛總之前完全唔怕公開話諗極都唔明，到家陣佢慢慢明白O2O係咩，終於今年着手搞O2O。
不過，睇嚟佢心入面仲有好多疑慮，事關佢尋日又提到，喺O2O層面了解客戶嘅購買行為，其實係咪可以令百麗做好更精準嘅營銷？喺佢心底依然有個問號。
大家心底何嘗唔係有問號，就係究竟今次百麗轉型要幾耐？盛總只係充滿唏噓咁話，做到佢退休，能否完成佢都唔知喎！呢位百麗老臣子加入公司已有四分一世紀，仲話已屆退休之齡……咁即係點？今回睇怕股東一樣咁唏噓。
余絲韻