今年末季環球股市勢必風起雲湧，故見十一假期復市以來，港股市成交都係淡如止水，皆因唔少資金都走去避險，唔敢入市。之不過，過往歷史證明，市場往往有危才有機。
九月份合格境外機構投資者（QFII）、人民幣合格境外機構投資者（RQFII）新開A股帳戶數目均創年內新高，顯示外資正部署隨時進場買A股，但到底幾時動手，就冇人知。
事實上，大家都預計末季美國總統大選及聯儲局加息會令環球股市震盪，無論大戶小戶都傾向駐足觀望，等破位先至行動，但從外資的準備工作可見，在其眼中長線A股是組合中不可少得的重點市場。
回說港股，上星期五打風休市，休市前交易日受惠於油價做好，油股以及油服股的氣氛都較佳，華油能源（01251）上星期四急升15%、百勤油服（02178）升12%、安東油田服務（03337）升近一成，呢浪都算係有交代。
不過，若然投資者呢刻冇貨在身，筆者就不建議高追，皆因環球經濟基本面其實未好過，而末季內地油企要按既定增產計劃生產，供應增加而需求疲弱，點睇今浪都不過是反彈而已，仲未見到行業景氣有轉勢迹象，談不上翻身。
股價同成交都有睇頭的個股，仲有北控水務（00371），上周四升4%，收報5.98元，成交3.38億元，經已是連續第四支陽燭，股價創今年以來新高，而且成交放量，值得關注。
消息方面，北控水務近日公開發行不超過28億元人民幣的可續期綠色公司債券，看來股價做好唔多唔少同集資活動有關。
走勢上，北控水務股價在悶市發圍，成交配合走勢轉強，若然短線能守穩5.8元樓上，是浪目標應可挑戰去年同期阻力位6.4至6.6元水平。
司慕渢