絲絲講場：投行員工8號波收窩心短訊

可揀答「我唔安全」

聽講有來自美銀美林嘅朋友今朝收到公司SMS，本來真係心都離一離，心諗唔係Chur到要人八號波都開工啩？！睇真啲，個短訊原來係話公司今日唔使開工，不過見咁大風，問吓同事安唔安全，仲叫同事覆番SMS確認。

公司仲畀兩個回覆同事揀：1）我確認我現在安全；2）不，我不安全（原文當然係英文，人家投行嚟嘛）。你睇公司幾有心！不過，唔知回覆2）會點呢可？話時話，如果身處危險又點覆SMS呢？

就咁嘅，絲絲聽聞唔少國際企業都有災難報平安系統，如果你SMS回覆唔安全，就會有人打畀你。呢個SMS是否100%堅？等絲絲搵美銀美林個Friend問真吓先，係噃，唔知佢依家安唔安全呢可？

余絲韻