絲絲講場：31年情玩完 大都會炒Snoopy魷

分手總要在雨天，尋日橫風橫雨下，一對國際級情侶驚爆「分訊」。話說漫畫人物史諾比（Snoopy）做咗大都會人壽（MetLife）品牌形象大使超過卅年，一直你中有我，我中有你。但金融世界入面，最終都係話分就分，史諾比被「炒魷」！

佢哋分手嘅原因，同天下九成九嘅情侶分手理由一樣──唔夾。呢對「情侶」嘅緣分，要追溯番去一九八五年，當年保險畀人好cool同有距離感，大都會人壽為咗拉近同零售客戶關係，於是「聘用」史諾比做親善大使，轉眼間兩者彼此扶持足足31年。

公司轉型 唔夾新形象

但外電報道，大都會人壽打算轉型，繼今個月初公布分拆美國零售分支計劃外，仲諗住日後專注企業客戶業務，力拓亞洲及拉丁美洲市場。呢一連串轉型下，企業形象同「前度」唔太夾，所以分手。

維持呢段關係，原來都使唔少錢。聽聞話佢哋一四年簽嗰份約，大都會人壽要每年畀1,000萬至1,500萬美元（約7,800萬至1.17億港元）史諾比同佢班Friend。所以話，呢段感情，其實都幾大負擔。

決定同史諾比分手後，大都會人壽好快手咁順便更新埋Logo同宣傳標語，似乎想放低過去，重新出發。但係話晒一齊咗幾十年，分手之後都總會有啲嘢留低，其實依家喺大都會人壽香港區網站上，都仲有幾個史諾比圖案嘅留影。絲絲望住枱面上張印有史諾比身影嘅大都會人壽卡片，都有啲唏噓。

私募轉學股神長情

幾隻巨型私募基金唔再做浪子，最近轉性講「長情」，仲講明喺股神巴菲特身上悟出真理，對某啲目標長線投資長至20年，比以前長揸多兩倍時間。

全球第二大私募基金凱雷集團（Carlyle Group），前幾日話旗下長線基金已經籌募咗36億美元（280億港元），主攻長線投資。

至於另一家巨無霸私募基金黑石集團，就預計為核心基金籌50億美元（390億港元），投資年期比一向做開嘅長一倍咁話（聽講一向做開嘅投資年期得3至5年）；就連歐洲最大嘅私募基金CVC Capital都一樣話搞長線投資基金。唔通世界變？

余絲韻