中國人壽保險（02628）前日發盈警，本來上市公司發盈警係好平常嘅事，但國壽今次發盈警就發得有啲迷離，搞到絲絲同唔少券商都一頭霧水。
話說國壽份盈警就寫明係「2016年第三季度業績預減公告」，話預計「第三季度」淨利潤較去年同期減少約60%。就咁睇，絲絲第一個感覺就係國壽要為第三季嘅表現發盈警；之但係，絲絲再睇，佢哋個「業績預告期間」又寫住係「2016年1月1日至2016年9月30日」！咁究竟係第三季定首三季呀？
睇番同日公布盈警嘅中國聯合網絡通信（香港）（00762），表達就清楚好多，講明係今年「首三季度」，簡單直接易明。國壽下次出盈警或盈喜都好，其實可以參考吓囉。
余絲韻