絲絲講場：貝索斯砌低巴菲特升呢第2富

蓋茨穩坐第一位

多得亞馬遜股價近月急升帶挈，貝索斯依家身家暴漲至704億美元（約5,491.2億港元），股神巴菲特身家648億美元跌落第三，第四位係facebook創辦人朱克伯格（身家551億美元）。至於第一位，今年都冇變過，依然係微軟創辦人蓋茨（身家817億美元）。

想當年，股神巴菲特八二年初上呢個美國富豪榜時，微軟仲係個細路，亞馬遜未出世。facebook？直頭連fb創辦人朱仔自己都未出世啦！

貝索斯九四年創辦亞馬遜，九八年先首次入榜。人哋股神由○一年起已經坐住第二位寶座，仲連續坐咗15年，啱啱先斷纜。

雲計算業績飆升

今年貝索斯確係鴻運當頭，亞馬遜股價過去六個月似火箭咁升，由二月初嘅474美元升到十月初嘅847.21美元歷史高位，就算回落咗，周二收市都仲報每股817.65美元，市值達3,876億美元（約30,232億港元）。

何解股價係咁升？美國大行分析，話係亞馬遜旗下嘅AWS雲計算服務帶挈。AWS最初只係個網絡服務，但近呢一年半，AWS業績突飛猛進，銷售額增長84%，營運利潤增長268%至7.18億美元！

今次股神輸畀亞馬遜CEO，唔通真係象徵住科網撼贏傳統實業！

余絲韻