孖妹S檔案：券商支笛聽唔聽好？

羅：銀河證券業務發展董事 羅尚沛

蔡：易易壹證券董事 蔡佑徽

仁：散戶 阿仁

寧睇沽空機構報告
要數最有噱頭嘅大行，點少得大摩，佢最興就係講「短時間內，有幾多個%機會會爆升/暴跌」，幾有型！另外，大家都好興講大摩吹「摩笛」，視乎佢口風，好似上星期被大摩狠削目標價嘅維珍妮（02199），上周三單日就勁跌11.33%。

仁：大摩報告鍾意玩快閃，轉軚又極快，呢個出完報告話跌，轉個頭就出份報告唱好，點跟？有時因應股份全年業績出報告，我就覺得冇乜參考價值，主要短線對股價有較大影響。由於大行普遍唔會Cover細價股，我就寧願留意沽空機構嘅評級同沽空報告，指標性會多啲，而大行報告多數就只郁大價股，個人就好少拎嚟做參考喇。

羅：咁有型嘅說法係一種Marketing，靠短嘅報告、一句吸睛嘅說話吸引人，最緊要係搵生意，主因投資者現時最愛「速食」，而且全行都會被吸引，從而製造群眾效應，希望個個跟，自然隻股就會升啦。睇大行報告要成份睇，公司背景、行業前景、盈利預測、估值原因都要睇，若然係熟間公司嘅，主打睇估值論據吧。

Kitty：冇法啦，呢一年港股成交縮得咁勁，大行為咗縮皮拎研究部開刀，搞到淨係跟到重磅股，仲邊有人跟中小型股吖？

里昂報告思路創新

基本上，絕大部分大行報告都差唔多，好容易睇到投資者變睡寶寶，所以一啲「有Heart」嘅分析員都好有情趣，鍾意搞啲花臣嘢，務求吸睛。

彩兒：例如里昂證券六月出過一份報告，主題係《巴菲特會否投資友邦（Would Buffett invest in AIA）？》，寫報告寫到拖股神落水，真係要寫個「服」字畀佢，報告出街至今，友邦保險（01299）都升咗約15%，好彩唔係「伏」啫。

羅：分析員都係打份工，要份報告多人睇，不外乎奇準或者係多噱頭、另類嘢，要捕捉客戶眼球，可能要好似寫小說咁寫。里昂報告唔係特別準，但大家都鍾意睇，因為佢曾創出風水指數同秋官效應，有獨特風格，係一樣Marketing工具，特別在製作精美，你哋咪鬼同佢哋認真啦！

熱門行業隨時玩完

愈多大行Follow嘅行業、板塊或個股，就代表喺市場愈人氣，即係代表資金傾斜度，可以睇到邊一類股份係寵兒，但說穿了，咪又係跟紅頂白。

蔡：個別熱門行業喺大行撥火下，或者會升得更勁，但撞正生命周期較短嘅行業，有機會一撥就玩完。手機配件股，例如舜宇光學科技（02382）同瑞聲科技（02018）就長玩長有；好似一一至一二年嘅頁岩氣板塊咁，就只有一年貨仔玩。不過，你諗真啲，原本應該畀尊貴客戶睇嘅報告竟然流出街，你唔覺得好有可疑咩？點解就要自己諗……哈哈！

睇埋報告背後理據

魚缸智慧有云，一眾大行報告都「吹雞」叫人唔好買賣嗰陣，就要獨立特行，施施然執死雞、買平貨；相反，就要醒目啲喺高位沽貨，千祈咪亂高追。

羅：呢啲係相反理論啫，一年多前都有多間大行集體唱好騰訊控股（00700），佢依家咪又係上到200元樓上？一間大行研究部一年花費2,000萬至3,000萬元，啲報告點都有威力，但就唔係絕對，主因大家都係持目標價嚟講，好少接觸內容，睇嘅話就應該睇入面嘅理據。

吼實長倉基金愛股

孖妹聽聞基金界有不成文規矩，部分要有大行分析員Cover先買得，另一方面，主打長倉嘅基金公司唔係炒一日咁大把，所以想搵長升長有嘅基金愛股嘅話，不妨可以喺大行報告中尋寶。

羅：唔使聽聞，係真嘅！大行好多時會Initial coverage（首次覆蓋）個別公司，佢旗下基金有機會因應份報告去買嗰隻股份，或引嚟其他基金跟風入場，呢隻嘢就有機會成為基金愛股。嗱！有樣嘢叫明日之星，你都唔知十年後邊隻先係藍籌股嘛，所以點都有機會係Initial coverage啦，以恒安國際（01044）為例，十年前邊有基金買？喺內地做女性用品，當時基本冇基金會睇，大行初次寫，慢慢就多基金投資。

唱反調定係陰謀論？

魚缸有個陰謀論，話大行最鍾意唱好後沽貨，唱淡後買貨，曾經有大行還擊話，出大行報告嘅部門係分析部，而投資嘅係另外一啲部門，所以冇利益衝突喎……係唔係真就得佢哋自己肚入面條蟲先知喇。

羅：投行就有好多部門嘅，我都有做過大行，出研究報告嘅係研究部，沽貨嘅可能就係一啲Sales、Dealer（交易員），部門之間係獨立同有Firewall（防火牆）。雖然研究部覺得隻股好得，但Sales、Dealer有機會唔Buy份報告，又或者個客想沽貨呢？可能個報告係長線睇好，但個客係睇短線呢？研究部對沽唔沽/買唔買貨係冇Say！

蔡：哈哈，陰謀論嘅嘢好難證實，但睇番過去客觀統計，又的確有唱好完就跌、唱淡後就升嘅情況。我認為，散戶應該將心機放喺解讀報告方面，睇番買入或沽出原因係咪Make Sense（符合常理），如果理據係夾硬，可信性就低，意味股價會行相反，係沽出信號，若然大市非常旺，大行仍然不合理地調高目標價，反映分析員過份樂觀，大家就要提高警覺，最經典係多年前嘅中國神華（01088），股價接近40元，大行將目標價提高至101元，完全係爆破先兆。

若有料報畀彩兒同Kitty或有嘢問，可電郵money.biz@on.cc

彩兒、Kitty