Market Insight：手機設備股可低吸

金融市場從來形勢比人強，今年六月英國意外脫歐，環球股市炒各國央行放水的預期下狂升，中港市場都要搵藉口炒，結果深港通、債轉股概念全部落鑊，草木皆兵，成為基金以至股民逐浪藉口。君可見，工商銀行（01398）於公投後4元邊唔覺唔覺返到九月下旬高位5.12元，一季時間勁升兩成八，芬佬企啱邊隨時可以提早收爐。

臨近美國總統選舉，聯儲局十二月加息機會升溫，意大利全國公投種種不明朗因素，加上全球股市累積升幅唔細，近期大家又努力搵掟貨藉口，最好笑同一個原因兩面講，債轉股由減輕內銀壞帳飆升，變成可能加重銀行資本負擔，加埋近排內地兩間企業，賽維LDK及東北特鋼進入破產程序，大戶掟內銀食胡變得振振有詞。

內銀不妨先減磅

在下好耐之前講過，中國經濟結構轉型前路漫漫，尤其要修正粗放型經濟，銀行不計後果濫借的日子，國有企業有拖無欠的後遺症，不良貸款將會長時間處於向上周期，內地銀行暴利日子成為過去。

俗語有話：「無咁大隻蛤乸隨街跳」，存款無息之下，內銀股普遍仲有5、6厘息，正係反映這個趨勢，內銀股可以中線炒內地中國經濟一、兩季的盛衰預期，但已不適合買入作長揸的投資者，尤其近排內銀的主力芬老買家已無之前咁好胃口，歐美國家有迹象為貨幣供應氾濫打修正球，貪高息盲衝入去賺息蝕價就無謂，如果低位有貨的不妨先減磅，第四季睇落內銀點都要回一回。

另外，三星Note 7手機因爆炸事件而停產停售，不過餘波未了，近日各地航空公司、香港民航處等，仍陸續宣布禁止帶呢款手機上機。對三星而言，事件固然造成金錢損失，但更重要係消費者對其品牌的信心，之後推出的新款手機銷情或有影響。有部分消費者或因此而轉用其他品牌的手機，最大競爭對手蘋果公司相信會係受惠者之一，一啲中國品牌如華為、小米、Oppo等，亦有機會分一杯羹。

睇番一啲手機設備股，雖然當中有些客戶包括三星，但目前所受影響有限，隨着中國品牌喺全球智能手機市場市佔率有上升之勢，相關訂單有望因此增加。做手機殼的通達集團（00698），主要客戶係中國品牌，加上汽車內飾業務未來拓展速度加快，不妨留意一下。

舜宇光學（02382）早前公布咗九月營運數據，主業手機鏡頭出貨量按年上升14%，車載鏡頭出貨量則上升27%。其股價由年初開始抽上，八月底高見42.9元後，近個半月都喺高位整固，升咗咁多已反映部分利好因素，抖抖亦好正常。

丘鈦候調整買入

講起鏡頭，近排留意到丘鈦科技（01478）兩個月內股價翻一番兼人氣急增，更創二○一四年上市以來新高。

仔細睇睇，原來係中績帶動，兩大業務鏡頭及指紋識別模組產品，期內增長速度均不俗，帶動收入按年升98.8%，純利多賺三成至8,200多萬元人仔，惟毛利率下降至9.3%。由於股價短期內升幅大，即使睇好其前景，亦應候回調先吸納。

古勝