Market Insight：大市充斥負面因素

中國經濟數據，比忽冷忽熱的天氣更難捉摸。昨朝早公布的九月全國用電量按年升6.9%，與上半年2.7%升幅相比，下半年經濟似有好轉迹象，到海關公布的九月進出口數據，雙雙差過大行估計，出口跌5.6%，與增長2.5%的預期有段距離。潛台詞即係話，人仔透過貶值刺激出口的力度未夠大。睇怕入咗SDR，有形之手可以退場之際，中期的貶值壓力會一浪一浪滲出嚟。

芬佬換貨頭都大埋

股市氣氛同天氣一樣瞬間轉冷，作為散戶，優勢係一注半注本錢，清倉全身而退唔難，反而不能持現金過多，免招客戶口實的股票基金，第四季無疑充滿挑戰。

先唔講美國總統大選同埋年底意大利公投等事件，睇番六月下旬至今，不少芬佬靠押重注在騰訊控股（00700）及阿里巴巴，收復上半年不少失地。騰訊作為指數重秤股，近排個勢即使唔「就」，要即時搵重磅股去代替唔易。

以往跌市，仲可以換落去公用及高息股，博跌少過指數頂住先。不過，今次加埋美國加息預期升溫，過去三星期十年期美債息由1.54厘抽上1.77厘的四個半月高位，連傳統防守股領展房產基金（00823）、中電控股（00002）都明顯轉弱，令芬佬想藉換貨減低跌市構成傷害，變得困難。

利率期貨顯示，十二月美國加息的機會率，矮仔上樓梯咁升至67.6%，只要此前十、十一月就業數據無異樣，十二月加息應無懸念。短期利率敏感股份，似乎還有回吐空間，好息之徒無謂急於一時。

內地大力推動基建投資，當中地鐵同有軌電車同屬城軌交通範疇。事實上，城軌交通近幾年的發展步伐不斷加快，城鎮化快速發展係其中一個原因。人口增加，交通亦要有相應配合，故相關行業增長前景不俗。

通號高位有待整固

從事設計、勘察及諮詢業務的城建設計（01599），上半年多賺近兩成至1.9億元人仔，期內取得的城軌交通項目，已超過一五年全年，下半年表現值得憧憬，昨微升0.5%收報5.23元，守4.9元之上，升浪應可延續。

至於主要做軌道交通控制系統的中國通號（03969），中期純利按年升四成。業績睇得之外，走勢亦跑贏大市，二月低見3.4元後隨即展開反彈，計至昨日累升達74%。該股目前喺高位整固，可候5.7元附近吸納，博後市有機突破6.2元阻力。

古勝