絲絲講場：按證「貼地」解畫逆按揭
香港按揭證券公司今時今日都驚「離地」。話說佢哋尋日搞咗個記者會講「逆按揭」（安老按揭計劃），絲絲一睇個地址，咦？今次難得喺葵芳新都會廣場度搞喎！
按證嘅活動通常都喺國金二期舉行，好有「高、大、上」嘅氣勢，就連按證總裁李令翔自己都話有啲「喺雲端嘅感覺」。今次推廣「逆按揭」，為要同市民拉近距離，選址「貼地」好多。同場仲有佗住B嘅前港姐鄧上文同佢阿爸嚟撐場。（又或者叫「屯門王子」鄧英敏父女都得，點叫就睇你係邊代人。）
擴至未補價資助房屋
講開「逆按揭」，尋日終於擴展至未補地價資助出售房屋，涵蓋公屋、夾屋及居屋單位。李令翔話，目前大概有40萬間未補地價資助房屋，預期超過100萬名市民可受惠。不過，想申請？要六十歲或以上先夠秤！
余絲韻