絲絲講場:亞洲百億富豪3日多1個

亞洲去年幾乎每3日就出一個身家近百億嘅富豪,大部分仲係白手興家添。睇埋落去,好快輪到你。

話說瑞銀同羅兵咸永道嘅調查發現,去年全球有210人嘅資產值,成功跨過10億美元門檻,即是身家近100億港元!

多數白手興家 中國最爆

當中亞洲佔113人,用一年365日計,亞洲幾乎每3日出1個「億萬富豪」。中國直頭出咗80個新進,平均53歲;香港都唔輸蝕,都出產咗11個。

咪以為人哋一定係「靠父幹」,報告話大部分人係白手興家嘅富一代。邊行可以白手興家搞到近百億身家?報告話,係科技、零售消費及房地產業。

不過,若然係想暴發的話,睇怕要喺中國。新鮮熱辣出爐嘅二○一六年《胡潤百富榜》,最爆睇怕係內地企業寶能系舵手姚振華,事關佢一年內身家急漲近10倍,由榜上第231位爆上第4位。好驚人!

亞洲有錢人嘅投資取態亦比較特別。顧問公司Capgemini研究發現,相比其他地區,亞洲有錢人鍾意自己管理投資,多過搵專業人士幫手;佢哋仲特別鍾意見到、摸到自己嘅資產,所以有15.4%嘅人愛揸Cash。

冇錯,「貧者愈貧,富者愈富」係真嘅;不過,喺亞洲零舍易發達亦係真嘅;啲百億元身家大部分係無父幹下靠白手興家搞出嚟,呢個更加係真嘅。所以都係嗰句,好快輪到你。

仲係葡萄?得,可以畀你即刻做百萬、千萬富翁,去以下呢10個國家:越南、蒙古、老撾、印尼、伊朗、津巴布韋、哥倫比亞、馬達加斯加、南韓、智利,佢哋幣值細,吓吓幾球幾球咁使錢都得,仲唔係過足「百萬富翁」癮?

余絲韻