中港股市昨日偏軟，恒指由周二高位24,064點殺到落23,200點水平，八百點上落就係咁快咁簡單！睇嚟大家都要習慣吓淡靜市，特別係如今內地正在收緊針對房地產的信貸，唔多唔少會影響到南來的資金鏈供應，秋涼天去吓旅行，可能比在魚缸磨爛蓆更划算。
近年陸續有傳統車企參與開發電動車產品，令到本來不入主流的電動車，開始成為行業投資的焦點。最近有研報告預計，到二○三○年，電動車將成為大城市的主流，佔所有車輛比率的三分之二。
觀乎目前內地的電動車行業發展，在政府的支持下，算是能越過傳統車企的阻力，快速成長。只是，行業在電池研發、充電設備、售後服務等方面發展仍有待完善，短期未必會見到太大回報，但長遠卻值得投資。
呢期指數表現唔得，但個別股仔就有作為。好似隻TCL顯示科技（00334），股價自九月尾開始由0.6元水平起步，反覆升至昨日高位見0.99元，惜昨日市況唔就，見午後獲利沽盤湧現，倒跌至0.86元，收報0.87元，無升跌。
TCL科技中期業績受惠於銷量增長、產品結構優化以及特殊項目因素而由虧轉盈，公司預計下半年會繼續改善，故見股價步出谷底有因。
不過，唔夠一個月股價已累升逾五成，抖抖氣亦好正常。短線不妨先觀望0.8元水平承接，相信待整固一段時間，股價有力挑戰1元關，失守0.69元止蝕。
司慕渢