絲絲講場:Coach賣二手貨賀75歲?

Coach(06388)買二手貨返嚟賣?真o架!不過,係佢哋今年為慶祝七十五歲嘅搞作。繼紐約、北京同日本後,今次輪到香港搞Pop-up Store(期間限定店),將會出售80個復古手袋。

復古手袋注入新元素

聽講呢80個手袋都係70至80年代嘅成品,Coach由二手市場買返嚟,話晒呢批袋都有番30、40年歷史,所以全部都要經過修復同加入新元素落去先再拎出嚟賣。絲絲就親手摸過呢批袋,啲皮點?你自己去試就知。

講番Coach呢兩年都有相當大轉變,由產品到舖頭到服務都改頭換面咗一次。聽佢哋公關講,品牌轉化成果都好正面,但「革命尚未成功」,計劃仲持續緊喎。梗係,一個七十五年品牌轉型梗需要啲時間嘅。

余絲韻