絲絲講場：港人理財識講唔識做

經濟合作與發展組織（OECD）訪問全球30個地方近52,000個成年人，Check吓佢哋對金錢嘅理解（8條問題考基本金融知識）、理財行為（有無準時找數等）、及財務態度（使錢定儲錢滿足感大啲等）。

法國人最叻 英肥佬

調查發現，最叻理財嘅係法國人，其次係芬蘭、挪威、加拿大及香港。但英國人理財能力就低於調查國家嘅平均水平。咁最多超級富豪嘅美國係研究調查榜上無名？Sorry，個調查冇包美國。

調查當中有8條問題考基本金融知識，有關通脹、投資風險和複利率等等，受訪者任揀7題來答。全球平均56%受訪者答中至少5條，呢方面香港威盡，事關84%港人答中5條，全球排第一。但一計埋理財行為與財務態度，香港即輸，但輸極都仲係頭五。

港人理財是否齋講唔識做？美國萬利理財亞太區總裁張佩儀話，對調查結果唔意外，因為港人投資鍾意跟風，加上講求效率，好少認真花時間了解投資產品特色同技巧，屬於「賺錢快，蝕錢亦快」。

以「複利率」為例，張佩儀話大部分港人講得出「複利率」特性，但有幾多人將「複利率」概念應用於自己嘅投資？

又係喎！股神巴菲特話自己致富之道係「複利率」，連絲絲都寫過N次，但絲絲依家都仲同《絲絲講場》搏鬥……唉！

余絲韻