筆者早前提到上周內地股市休息，大戶撐住港股在橫行區頂部附近，似乎要等今個星期港股通重啟後才有行動。
結果昨日港股復市高開162點仲令部分投資者以為有運行，豈料最高衝到上24,064點後就掉轉行，並重回早前23,239至24,004點橫行區內級級落，恒指收報23,549點，跌302點，最慘係主板成交大增至近期少見的852億元，晨早高追的好友真係中伏！
外圍風高浪急，英鎊悶跌隨時係小兒科，萬一美國總統大選有甚麼意外，美股一旦反高潮的話，屆時環球金融市場就真係無眼睇。
昨日期指日市反覆向下，到歐股開市先叫做喘穩，惟即月期指於現貨收市後跌多浸，最終跌405點，低水125點，總成交約14.3萬張。
不過，未平倉合約達15.7萬張，究竟大戶賭十月最終會出現「股災月」，抑或是長假期後補倉活動，都仲要睇定啲。筆者昨日訂下的23,680點及23,750點兩個短線支持位既已失守，再開好倉都係要等等。
John Mullen