港股交投乾塘，主板成交僅486億元，重磅股除咗濠賭股之外其他都冇咩睇頭，游資集中火力攻二、三線股。中國恒大（03333）通告披露建議重組的合作協議，被視為擬分拆內地房地產業務借殼深圳A股公司──深圳經濟特區房地產集團（簡稱「深深房」）在A股上市。
集團尋求在A股上市，有助更好體現資產價值，早前亦曾傳出恒大正物色A股公司，如今落實對象，相信今日復牌股價應可高開，停牌前報5.24元。
但話分兩頭，內地陸續有城市推出調控措施，但相信降溫作用有限，大概炒家們都睇準阿爺第四季面對外圍市場風險上升之下，要隻眼開隻眼閉，唔會一下子箍死內房。筆者則認為，能令內房炒風降溫的有效招數，係深港通啟動，兩地股市重現活力，只要資金有出路，相信投資者唔會再去高價瘋搶房子。所以講到尾，筆者還是對深港通抱有希望。
回說個股，最近重型機械製造商Caterpillar宣布旗下機械產品全球加價最多4%，明年一月起生效。國際龍頭企業率先加價，應該對行業發展有正面啟示。講到重機股，筆者想起隻中國重汽（03808），昨日收報4.14元，升0.24%。
若行業景氣真係有改善，此股值得關注，中線不妨留意在4至4.1元水平收集的機會。
司慕渢