絲絲講場：手機合約有乜用？發債囉！
睇財經版，都會聽過有人將按揭包裝成證券，發行按揭抵押證券（MBS，Mortgage-backed security是也）抽水，不過金融界創意無邊，華爾街最新鍊金術係，將手機合約證券化變債券！
集資93億 認購勁超額
美國最大電訊商Verizon（維里佐通訊，即是七月吞咗雅虎核心互聯網業務嗰間呀），就喺同月成功攞手機合約發債集資12億美元（約93.6億港元），唔單止係全球首例，認購仲勁超額，有投行話市場好期待同類產品出場！
呢種新興金融產品嘅背景要追溯到一三年，當時美國大型電訊商開始興起為客戶提供新機貸款，咁做可以畀顧客多啲空間選擇買咩機，提升月費計劃嘅吸引力，客戶定期繳交嘅還款就會成為「手機合約債」嘅現金流。不過，Verizon之前嘅手機合約債，淨係喺銀行範圍Sell，去到掛牌就真係Verizon第一。
提到MBS，相信好多人都會即刻諗到金融海嘯，諗到德銀依家被指不當銷售MBS畀美國重罰，翹起全球股市。
不過，除咗個別芬佬（Fund Manager，基金經理者也）嫌唔夠肉食之外，市場對於「手機合約債」嘅反應幾正面，評級機構標普睇好個市場會繼續增長，規模最多有成400億美元。加拿大皇家銀行旗下嘅RBC Capital就話，Verizon新式債喺二級市場交投好流動，攞高質消費者（手機）貸款包裝發債，分分鐘仲好過普通企債添！
余絲韻