Market Insight：煤炭股短炒價值高

自去年希臘選出個左翼總理，一心同歐洲央行攬炒（最後鬥唔過銀紙），用賽馬術語，一年多來環球政經大事真係場場爆，仲愈爆愈甘，正如今年六月英國脫歐公投出現意外結果。再睇今年重頭戲美國總統選舉，順口雌黃的特朗普喺共和黨內過五關斬六將，殺入最後直路，話唔埋最後真係成功入主白宮，嚟個冷Win三串一。

古勝唔係危言聳聽，回帶睇，海嘯爆發，全球鬥印鈔，貧富不均持續惡化，也是民粹主義趁勢而起的火種。之所以亂噏當秘笈的特朗普咁有市場，一句講晒，將所有問題推喺現政府身上，美國人自然聽得高興。

見近兩日個市，對由傳統媒體「用心做」的民調結果咁興奮，睇到在下都驚驚哋，十一月會再一次股市反高潮。

油股反彈水位有限

講番個市，港股通休息，成個市靠「三桶油」及煤炭股撐住，油組八年來達成減產共識，油價大彈成為三桶油炒上藉口。

如果唔係金魚一樣的記憶力，五月開始油價不過40至50美元間上落，隔晚升上47美元會唔會高興得太早？況且，減產最快十一月至成事，非油組成員國如俄羅斯等已虎視眈眈，等緊炒家抬轎畀佢出貨。在新興市場需求面仲係好弱之下，睇嚟油價只會短期反彈，油股都係掂唔過。

相比下，煤股短炒價值應該更高。煤企債轉股如箭在弦，國家供給側改革做到過晒龍，近排內地電煤價屢次破頂，供應緊張搞到電企嗌救命。結果龍頭中國神華（01088）逆市獲批增產，昨股價率先見52周高位。論業績與煤價的敏感度，無可能唔炒中煤能源（01898），可以睇實佢幾時跟住破頂。

汽車暢銷帶旺敏實

喺國策推動下，今年汽車銷量節節上升，帶動汽車股股價向上。當中升勢最凌厲一定係吉利汽車（00175），由五月中的3.6元水平最高升至7.29元，近月同大市一樣窄幅上落，於高位整固。至於北京汽車（01958）三個月累升約六成，昨略有調整，仍處於七月延伸的上升軌中，走勢向好。

汽車相關股亦有受惠，設計、生產零件的敏實集團（00425）上半年收入按年增22%，純利則增長三成。近年汽車鋁產品的應用逐步提升，加上毛利率較高，有助提升集團盈利，而人仔貶值同時有利出口。走勢上，該股上月底升至30.6元遇阻回落，周三低見25.7元，昨日反彈近5%，收復10日及50日線，成交見配合，後市有望再上試高位。

古勝