理財Campus：市場先生：債唔抵買
「其實買股同買債都有風險，但睇番依家債息咁低，我就唔係咁建議再買債喇。」有「散戶Blog王」之稱的市場先生表示，環球經濟受壓，歐、美、日央行均推出減息及量寬等措施刺激經濟，令市場資金氾濫，且湧入債市推高債價，變相令債息下跌，故市場先生認為現時債券「唔抵買」。「依家唔係諗買股定買債，而係諗買邊隻股。」
藍籌股純收息可考慮
「滙豐控股（00005）前排最高去到8厘（股息），人就係咁（口架）喇，見過8厘就會覺得6厘幾（近日股息）唔太吸引，不過如果純收息都可以考慮，但如果息率跌破6%就要諗諗，同埋回購就嚟結束時都要小心。」
「中電控股（00002）唔使諗啦，一定係買股，股息高過債息咁多，不過呢啲公用股有少少兩頭唔到岸，升市又唔係升得多，跌市嘅時候唔少藍籌又跌得多過佢，低吸嗰啲藍籌好過，不過買嚟收息係冇問題，但股息率4%以上會好少少。」
「中銀香港（02388）同工商銀行（01398）股票比，就梗係買中銀香港啦，話晒香港嘅經營環境比較穩定，冇咁受內地政策影響。」
「雖然碧桂園（02007）債息高過股息，但係內房債息最高可以去到9至10厘，依家又得4厘息，梗係唔買債券，而且內地老闆作風冇咁穩健，要買都係買啲港資房地產。」