絲絲講場：保險師兄6招入百萬圓桌會
做得保險代理，個個都想進身「百萬圓桌會」（MDRT），你都想？有竅妙。英國保誠分行經理及執行理財策劃師鍾照明（Jimmy）醒大家以下六招成功秘訣。佢過去八年都係MDRT，所以呢六招包Work。
第一招係睇性格決定事業，當初Jimmy讀屋宇設備出身，覺得工程業同自己性格有落差，最終選擇咗保險業，一做就做咗17年。第二招係多管齊下開拓客源，例如可以先問親朋好友有冇保險需要，之後透過轉介同Cold Call擴大客源。第三招係搵到目標投保人後，要一擊即中搵出投保人嘅保險需要。
客戶互動 細心對待
第四同第五招，分別係提供貼心售後服務，同私底下多同客戶有互動。點多啲互動？Jimmy憶述，二○一三年佢出席美國MDRT年會，想帶啲驚喜畀客，於是佢出發前搜尋平日私交甚篤而又有小朋友嘅客戶facebook帳戶，睇佢哋同仔女嘅生活照，記低佢哋仔女鍾意嘅顏色同衣服尺碼等。去到美國特賣場，佢就買咗差唔多60件小朋友衫，返嚟再配張心意卡送畀客戶！
第六招係咩？就係平常心！Jimmy話唔好太介懷業績，其實做到MDRT嘅「全人理念」先至最可貴。
余絲韻