絲絲講場：郵儲行長示範高管絕學
中國郵政儲蓄銀行（01658）尋日上市，呢隻新股夠晒巨無霸，啲撐場嘉賓仲位位重量級，不過最令絲絲大開眼界嘅，反而係見識到郵儲行行長呂家進完美示範，點做一個至醒嘅頂級高管。
話說新股首日掛牌，公司高層例牌會喺踏正開市嗰一刻（即係九點半）敲鑼，尋日就三隻新股三隻鑼。
禮讓董事長攞彩敲鑼
哈，絲絲眼利，發覺呂行長上到台雖然揸住支鑼棍，但隻手唔見有咩敲鑼準備喎。果然，呂行長只係做樣冇真敲，最重要嘅敲鑼一刻留畀董事長李國華一人獨享，反觀兩旁嘅上市公司都係雙人敲鑼。呂行長咁識Do，李董當然笑到見牙唔見眼。果然，彩，係要留畀老細嘅。
巨無霸上市自然有重量級嘉賓撐場，包括財政司司長曾俊華、財經事務及庫務局局長陳家強、證監會主席唐家成、香港交易所（00388）主席周松崗同行政總裁李小加等，夠晒齊腳。
郵儲行仲預備咗份特色紀念品畀港交所，係由《中國郵政儲蓄銀行》、《郵政儲蓄》特種郵票同埋《丙申年》特種郵票三種郵票組成，圖案係猴同馬，象徵「猴年馬月」嘅吉祥寓意，即係時機難得、萬事皆成嘅意思。
股價又點先？尋日收市報4.77元，比招股價微升1仙，叫做每手賺10蚊。
富時拒絕提早納入
不過呢，富時上周一話，郵儲行是否可加入快速納入富時全球股票指數及富時中國50指數，要睇佢首日收市價而決定，又話若要獲快速納入富時全球股票指數系列嘅資格，郵儲行嘅總市值與可投資市值必須高過48.11億美元及16.03億美元。
郵儲行已經符合晒上述條件，點知富時尋日收市後宣布，話因為郵儲行流通市值不足5%，所以唔會將其提前納入上述指數！噢！
余絲韻