絲絲講場：史上最錯「鱷」3單大刁
尋日講到六位華爾街大鱷與經濟學大師，鬥晒各自畢生最威投資。（Miss咗？唔驚，去「東網Money18」嘅「致富智庫」專頁可重溫，即（手禁）QR Code啦！）
大鱷亦有失威時，以下係3條大鱷自問投資最失威最慘烈嘅一次，佢哋犯嘅錯，簡直有你又有我。
洛布全副身家押死一股
維權投資者洛布（Daniel Loeb）最失敗嗰次過錯，幾乎人人會犯，就係無分散投資。
話說佢大學時炒股，將全副身家12萬美元押晒落一隻人工呼吸機生產股度，點知間公司捲入幾宗死亡醫療事故，洛布就咁一鋪清袋，好幾年先恢復元氣。
克拉默衰唔服輸 一路溝淡
克拉默（Jim Cramer）呢位CNBC財經頻道名嘴嘅最錯，就係唔服輸，見跌再溝貨。
話說佢睇好隻儲存裝置生產股，以每股2美元入咗幾十萬股後，間公司唔掂，但佢唔服輸，股價一路瀉，佢就一路增持過百萬股「溝貨」，結果跌到變仙股，渣都冇。
艾肯唔知公司營運Out咗
股壇狙擊手艾肯（Carl Icahn）話自己成世最失敗嘅投資，就係美國影片租賃商百視達（Blockbuster），佢失策在無及早睇清當時公司營運模式已經Out咗。嗰時Netflix呢類網上視頻興起，啲人根本唔去租碟。
余絲韻