絲絲講場：馬蔚華33字堅•教投資

退休做FinTech顧問

佢就係招行（03968）前行長馬蔚華。佢一三年退休離開佢湊大嘅招行後，一直低調，大家只知道佢係潤地（01109）獨立非執董，查實佢亦做咗一間FinTech新公司嘅顧問。

呢間香港金融數據證券董事長林憬怡話，佢哋最大嘅生意係為證券行提供大數據、分析同買賣嘅科技方案，中、港、台三地都有據點同埋科技基建。間公司喺內地同印度，都有用手機App舉辦過股票同外匯模擬買賣比賽，玩家超過一百萬人。

先學炒匯 睇宏觀經濟

林憬怡話，招行前行長馬蔚華唔只係好重要嘅公司顧問，馬總仲教大家炒股前要先學炒匯。點解？因為炒匯一定要留意國際新聞，從而掌握宏觀經濟。講到呢度，林憬怡仲忽然背起33字真言嚟：「不知未來者，無以評論當下；不知世界者，無以評論中國；不知宏觀者，無以評論微觀」。

原來呢33字，係馬總教導員工嘅金句。重點係，一切都關宏觀的事，大家收到未？

余絲韻