絲絲講場：復星董事長：P2P呃人
早排內媒瘋傳復星（00656）將會搞P2P金融服務平台，仲會係今年上線，講到似層層咁，又話佢哋可以成為平保（02318）旗下陸金所嘅最強勁敵，原來一切只係FF出嚟！（FF者，Final Fantasy，幻想也）事關尋日復星董事長郭廣昌出席中期業績會，就話唔知邊度傳出呢個消息，大力否認傳聞。
P2P金融，又叫P2P信貸，一般指點對點（通常係個人對個人）嘅民間小額借貸，通過電子商貿網絡平台進行。
咁郭總究竟否認得有幾大力？佢除咗話「不知道哪來的消息，復星從來沒有參與P2P的計劃」，更大肆抨擊P2P，「從來不看好P2P，雖然不是全部，但基本上都是騙局」，佢認為P2P完全偏離風險定價能力，集團一定唔會投資。
郭總今次咁激，矛頭係咪指向靠P2P金融壯大嘅陸金所呢？市場又傳話陸金所唔玩P2P金融，唔通又係好似郭總咁「睇透晒」？
余絲韻