絲絲講場：金嗓子江老娘廣東話耍家
喉糖股金嗓子（06896）董事長「江老娘」江佩珍雖則係廣西人，但之前話廣東話幽默得嚟又斯文又有內涵，自爆鍾情到喺機場偷聽人講。江老娘尋日業績會上就用廣東話Talk足20分鐘，等大家一齊見證佢對廣東話嗰份愛。
江老娘一邊Show廣東話，一邊仲多次要在場者掌聲鼓勵。佢仲發現，原來身邊嘅副總經理兼執董何錦強原來都識講白話（即是廣東話），江老娘即刻識英雄重英雄開口讚對方「原來你講白話都幾好」！
江老娘親切感真係跑贏唔少老牌藍籌，但金嗓子中期就無派息喎，江老娘來一句「下半年再說」。股民受唔受？金嗓子昨收報7.68元，跌咗1%咁囉。
余絲韻