絲絲講場：內房老總集體玩No Show

近期內房圈最熱爆焦點莫過於萬科股權之爭，市場都關注話題人物好似萬科主席王石、總裁郁亮等嘅最新動態。之不過郁亮上周已經因為要處理股權問題而罕有地缺席中期業績記者會。

大家即刻轉移目標，等待曾經傳過收購萬科股權嘅「地產狂人」融創中國（01918）主席孫宏斌，同埋堅係買入萬科6.82%股權嘅恒大（03333）主席許家印（許老闆）出嚟解畫啦！點知孫總同許老闆又係No Show！唔通夾埋嘅？

恒大副主席兼總裁夏海鈞就話，主席許家印因為要參加喺北京舉行嘅全國政協常委會，「不參加（業績會）很正常」，仲叫大家以後要習慣中期業績會許家印都唔會嚟咁話。

融創主席有重要會談

融創執董兼行政總裁汪孟德尋日就話，孫宏斌因為有重要會談撞期而缺席，仲話「老孫還是挺願意參加的，希望下一次再跟大家交流！」

絲絲醒起，前日市傳萬科總裁郁亮同華潤集團董事長傅育寧見面，亦有同恒大集團總裁夏海鈞交流添。咦？孫總嘅重要會談，會唔會就係同郁亮或者王石傾呢？融創汪孟德無透露，但就話孫總早前已明確否認買萬科股票，「未來也沒有考慮」咁話。

余絲韻