Market Insight：中飛租賃值得憧憬

雖然耶倫於演說中的言詞比市場預期鷹派，不過及唔上費希爾之後補嗰句，主席所指「符合最快九月加息的聯儲局預期」，美股即市腳仔軟，道指由最多升124點變成最多跌113點。睇番聯邦基金利率期貨，九、十一及十二月的加息機會，由Jackson Hole前的32%、37.8%及57.4%，升至42%、47%及64.7%。美匯亦轉強，十年美債息返到1.629厘，是英國脫歐後新高。

在客觀條件下，英國公投後市場炒全球央行繼續開大水喉的預期，似乎暫告一段落，聯儲局可唔可以因為總統選舉在即關係，拖到十二月至出手，本周五的就業數據會相當關鍵，市場估非農新增職位約18萬至20萬份，最理想是符合與稍稍低於預期之間，一旦超過20萬份，只怕無得再拖。

華晨最壞時間已過

業績期尾聲，可以尋寶的選擇減少，留意華晨（01114）成績表麻麻，半年賺18.02億元人仔，跌5.6%，上周五股價搶高5.8%報8.62元，強勢冠絕一眾車股。績差做好，主要係大行睇最壞時候已經過去，上半年寶馬合營銷量升1.7%，貢獻卻減少6.9%，但卻稍高過大行預期，即使麵包車虧損稍多於估計，已無阻大行認為業績見底的利好事實。野村估在X1銷情帶動下，加上新廠的效率改善及新一系及五系推出，一七年盈利可升三成二，目標價睇10.74元。近兩個月華晨在8至9.4元之間浮沉多時，且看績後能否突破。

喺香港上市的飛機租賃股有兩隻，除咗中國飛機租賃（01848），仲有六月上市的中銀航空租賃（02588）。中飛租賃中績表現突出，收入按年增長逾六成，純利更加大增1.06倍至2.4億元，每股派中期息14仙。

積極開拓海外市場

好多航空公司有自己機隊之餘，都會租飛機，以應付新增需求同節省成本。內地出國旅遊的人多，帶動航空業近年快速發展，飛機租賃生意亦逐漸冒起。

中飛租賃近年食正呢條水，業務規模不斷擴大，帶動盈利上升。中國市場固然大，但以單一市場作為收入來源始終有風險，集團積極開拓海外市場，舊年先後與越南及土耳其的航空公司合作，上月又與日本一航空集團訂立租賃協議，前景值得憧憬。

該股上周五在業績帶動下做好，盤中高見9.11元，惟未能守於9元樓上，收升3.6%報8.9元，短期若可重上9元並企穩，有望再上，不妨待破位後再跟進。

至於中銀航空租賃，係亞洲最大及全球第五大航空租賃公司，規模大過中飛租賃幾倍。截至六月底，自有及代管的飛機共265架，飛機利用率為100%，背後有中國銀行作支持，實力毋庸置疑。不過上市後股價反覆向下，未有大起色，上周五收報38.1元，仍較招股價42元低9.2%。

古勝