Market Insight：地產股不妨先食胡

恒指周三跌穿10日線後，昨日則跌5點報22,814點，主板成交680億元，比前日多一成，扣番萬洲（00288）配股上板，交投實際同周二、三相差不遠。再退一步睇，英國脫歐後炒全球央行放水，炒埋港股業績期，落得鑊的都已炒得七七八八，期指好友埋門先放軟手腳，臨近期指結算大市先嚟跌穿10日線，睇落並非吉兆也。

早排提過陪朋友四圍睇樓，租與買的盤源同樣緊張，已親身體會樓市熱度回升。似乎去年中進入調整樓市，在環球熱錢氾濫下已拗腰回升。

最怕耶倫再提加息

樓市氣氛改善，首個港人港地項目開價令人嘩然，但都唔及麵粉貴過麵包咁震撼，早兩日屯門住宅地以14億元高價成交，較半個月前同區地皮高六成六，地皮價計已經拍住同區二手盤呎價，以30億元總投資興建80個向海豪宅，計埋利息及預期毛利，可以預期批屯門豪宅落成後，至少賣半億一幢，都咪話唔誇。

英國脫歐公投後，古勝第一時間建議大家追番地產股，期間恒指低位彈16.1%，地產分類指數足足升22%。心水的新地（00016）升幅更達29%，都算有個交代，但要小心，幾隻重磅地產股八月上旬開始已經唔肯行，雖然樓價及地皮拍賣價屢創新高，似乎短期升勢差不多。

早個幾星期野村建議食胡，地產股都唔多肯落，不過，央行行長年會就算量寬吹到再大，地產股都未必升得幾多，但至怕萬一，倫媽又為加息開定後門，講幾句年底前加息時間上恰當的言論，地產股捧場客隨時賺頭蝕尾，有貨的今日不妨酌量減磅。

蒙牛乳業（02319）周三晚公布中績，收入及毛利分別按年升6.6%及13%，惟純利倒退19.5%，即使唔計雅士利（01230），純利都跌16.1%，主要係銷售開支增加。不過，股價昨日卻不跌反升，收報14.58元升近12%，成交急增兼有大行唱好。

蒙牛業績唔算失禮

其中大摩認為其核心盈利好過預期，給予「增持」評級，目標睇13.8元，美銀美林更將目標上調至16.5元。以走勢論，昨日該股以大陽燭向上，一舉收復多條平均線，突破咗14元阻力，若然可守於其上，股價料有進一步反彈空間。

內地原奶產量過剩，令奶價下跌，之前更有報道指奶價仲平過水，加上進口大包原料奶粉的競爭及內地消費增長放緩，做上游業務即係養殖為主的企業受影響較大，如現代牧業（01117）。集團上半年盈轉虧，錄得虧損5.66億元人仔，當中一個主要原因係同Success Dairy的對賭協議，上月初集團發盈警時，已預計有關項目錄得非現金公平值虧損約4億元人仔。

現牧股價由舊年十月反覆向下，由2.7元插到上月0.98元先止跌，雖然近兩周有回升迹象，昨日亦升4.1%，但仍受制於100日線1.3元阻力，博反彈不宜太進取。

古勝