絲絲講場：瞓覺暗「床」GDP新計法

絲絲可以喺度講嘅床上活動，得一樣，係瞓覺。睡眠休息佔人活動時間至少三分一，床嘅用途對經濟不知有幾大影響，價值遠超過大家花喺床品上嘅消費。但計GDP（國內生產總值）時，床品消費只係佔好細Part，反映唔到床嘅真正價值。

數碼產品條數唔同

其實仲有好多活動嘅經濟價值，齋以物價係反映唔到嘅，但現時計GDP，係按生產、收入及消費嚟計，計法係咪好似Out咗呢？

講呢啲無Feel？就同你埋身啲講囉。當你一樣係畀130蚊，買隻CD與買個音樂App無限Download，對你嚟講，兩者價值點睇都唔似係一樣啩。

又好似facebook同YouTube咁，夾夾埋埋向廿億用戶提供網上資訊與娛樂，但因為係免費，按傳統計法唔當入經濟貢獻，咁GDP條數又點計呢？

嗱，美國商務部經濟分析局同費城聯儲銀行又真係計畀你睇，佢哋話當呢啲交易係「以物易物」咁入數計，免費媒體喺九八年至一二年間每年谷起美國經濟增長0.009%！得0.009%？！真的嗎？

點解絲絲忽然咁多疑惑？皆因睇見IARIW（國民所得與國富國際研究協會）呢幾日喺德國開研討會嘛。

至於答案？呢個世界唔係乜都有得解嘅。

余絲韻