絲絲講場：Uber的士目標零司機？
美國電召專車應用程式Uber開創召車行業發展，如今更搶先Google和福特等，將無人駕駛車帶到街頭，睇番Uber喺全球引發唔少爭議，包括畀的士司機批評「搶飯食」，呢招話唔定係Uber斬草除根之術，實行一鋪清司機袋。之不過，創辦人卡蘭尼克否認其事。
市場質疑估值有水分
Uber與富豪汽車合作，最快今個月喺美國賓夕凡尼亞州匹茲堡試行無人駕駛車，目標係建立有100輛車嘅車隊。Uber仲同時宣布收購無人駕駛貨車技術公司Otto，係該公司迄今為止最大宗收購案。不過，無人駕駛始終係新技術，試驗期間車上將有兩位Uber員工坐鎮，一位負責緊急操控，另一位則於乘客位進行觀察，而無人車只會行駛有限距離。
卡蘭尼克相信無人駕駛技術將顛覆一切，Uber必須早着先機，但真人司機並不會因此迅速減少，反而會創造更多職位。
近排Uber新聞多多，如市場最新就質疑其作為全球估值最高初創公司嘅身份，估值625億美元，實際連300億美元都唔夠。或者，如果好似佢咁講，無人駕駛真係實現，就代表一直反對Uber嘅司機消失晒。到時，絲絲相信Uber估值又點止上述嘅數吖？
余絲韻