Market Insight：新能源股保持強勢

自從八月初開始，散字派憧憬深港通將通車而雀躍，二三線股老早炒到出煙。隔晚古勝啱啱約咗班外資行賓架happy hour，聽聲氣同魚缸友真係冰火兩極，大都對深港通的沖喜效果嗤之以鼻。

無疑消息醞釀多時，最早五月已經炒緊擴容（港股通額度及後不足500億元人仔）兼通車。由投行生意去睇，深港通雖然一開波已經不設總額度上限（滬港通也一併取消），反而擺出姿態，有點似唔怕你精，唔怕你呆，最怕你唔來，芬佬嫌棄A股對外資諸多限制，家陣卻任你買，掉轉頭往往就唔馨香。

外資芬佬取態已變

以前中國經濟有8至10%增長一年，匯改後人民幣年年升值，即使唔買A股，單係泊住人民幣，賺息兼賺價都夠晒皮。

然而，今時唔同往日，中國經濟已跌入L形的低增長形態，人民幣長遠有貶無升幾成共識，加埋A股經過舊年杰撻撻的股災及粗暴救市後，同以前外資在QFII爭崩頭唔夠使的日子，可謂不可同日而語。

家陣中港股市只要好番些少，成班外資基金經理已圍埋研究有咩short China古仔可以發揮。如果下半年無辦法谷番起個GDP，企業盈利走下坡的趨勢無變的話，真係放再多配額都係無用。

講番個市，昨日尾市由升轉跌，不過多隻燃氣股及新能源股在佳績帶動下逆市跑贏大市。當中，在下發現表現最突出係華潤燃氣（01193）。

集團上半年收入按年減少1%，但仍賺19.6億元，增長達26%，主因近年實施的居民客戶階梯定價制度，以及新增居民接駁用戶增加令相關收入上升，階梯定價即係好似我哋交稅咁用累進制，天然氣價收費分為三級，簡單嚟講就係用得愈多就愈貴。

潤燃公布中績後多間大行唱好，昨股價以大陽燭上升，突破自去年六月以來主要阻力位25元，升逾一成收報26.2元兼創52周高位，成交增至2.6億元。若然繼續有人氣結集，後市有望挑戰去年四月高位27.5元，可候回調伺機跟進。

今年首六個月，中國天然氣消費量按年增長9.8%，雖然未回復雙位數增長，但已經好過舊年好多，一五年全年嘅消費量增幅只有5.7%，係近十年最低。下周二公布中期業績的新奧能源（02688）亦值得留意，其股價日前已重上多條移動平均線，守40元有機上試45元。

華電福新（目及）實業績

內地空氣污染問題十分棘手，相信中央將繼續推出扶持行業政策，使用潔淨能源係大勢所趨，天然氣及新能源的發展有望進一步加快。龍源電力（00916）及華能新能源（00958）自公布中績後分別連升四日及三日，累升7.5%及16%，本周五派成績表的華電福新（00816）亦升近9%。

集團上月底已發出盈喜，預計中期多賺兩成，若業績對辦的話，有望再上。深港通已經正式拍板，高盛就此發表報告，列出可吸引南下資金的中小型股，當中包括華電福新，大家不妨留意一下。

古勝