絲絲講場：內地電訊圈上演《三國》？
聯通（00762）尋日舉行中期業績發布會，問答環節有人提到「聯電抗移」，指聯通同中電信（00728）合作，企圖對抗喺內地電訊市場獨領風騷嘅中移（00941）。聯通董事長兼首席執行官王曉初聽完笑笑口話，講到好似《三國演義》咁，電訊業合作有幾奇啫！
求雙贏 歡迎中移入隊
「聯電抗移」者，即是「聯（通）電（信）抗（中）移」。王總笑話，「聯乜抗乜」講到好似《三國演義》入面赤壁之戰，東吳與蜀國夾埋對抗魏國。不過王總明言，一向提倡行業入面「競合」，即係競爭同合作並存，一個行業唔會淨係得競爭，同中電信合作係要喺4G發揮協同效應，但如果中移有興趣合作，只要能夠達致雙贏、降低成本、提高效率，聯通都歡迎咁話。
之後又有人問，聯通同中電信會唔會合併？王總就話，呢層要「阿爺」話事，唔係兩家話合併就合併。不過咁，王總話，暫時亦未有收過咁樣嘅要求，不過佢順帶盛讚舊東家嘅現任管理層做得好好，祝願佢哋繼續發展咁話。
怕未必個個睇過《三國演義》，絲絲不妨講多句。「聯孫抗曹」係東漢末年劉備聯同孫權對抗曹操，兩家聯手喺赤壁之戰打殘曹操，令曹操再無力南侵，造就三國鼎立之勢。家陣唔知邊位係劉備？邊位係孫權呢可？
余絲韻