絲絲講場：財星搞「鬼」講邪釘體驗

落唔到盤 翌日大插水

晉裕環球資產管理投資研究部總監林偉雄話上星期佢同事用手機落盤落唔到，點知第二日隻股就插水，「唔知係咪個天唔想佢輸錢！」

新鴻基金融集團財富管理策略師溫傑都有經歷。有晚佢喺廳瞓緊，電視忽然自行開着！但冇人掂過個遙控……唔通提佢個市有嘢？定係溫傑嗰排太心掛個市，夜半都仲磨喺個廳想知埋個美市點，攰得滯？

仲有舊年內地股災時，有人話喺IFC男廁撞到索羅斯！不過幾日後，有內地傳媒引述索羅斯發言人澄清，索羅斯嗰時喺美國長島屋企……

查實搵錢最百無禁忌嘅，都算係投資凶宅。雖百無禁忌，但就有竅妙。資深物業投資者伍冠流教路話，若投資凶宅，買涉及自殺嗰啲，好過買謀殺。點解？絲絲聽講個價爭一截o架。

余絲韻