上周內地公布一系列經濟數據，七月份外貿收據遜預期，而首七個月民間固定資產投資同比名義增長僅2.1%，較首六個月增幅回落0.7個百分點，其中官方重視推動的第三產業增幅僅0.9%，較首六個月增幅回落0.7個百分點，情況真係不容樂觀。
七月經濟表現如是，如今第三季情況都未見大起色，如果要保底，睇怕第三季點都要做啲嘢，降準減息、深港通等短期都成為市場焦點。
不過，見到七月內地多地區出現水災，但當月新增人民幣貸款仍遠遜預期，反映中央政府並不急於出手托市，事關外圍股市位高勢危，加埋唔知美國總統大選事態發展，太早出手，反而會變得無計可施！
技術上，上周恒指50日升穿250日線，乃一四年五月以來首見，勢係有喺度，就睇啲游資配唔配合到，若成氣候，今浪目標係去年十月高位23,400至23,500點水平。至於國指，上周確認企穩250日線之後，成功攻下9,500點關，下一個大位在10,000點關，短線回吐初步支持在9,200點水平。
上周五內銀股表現都唔錯，其中新華保險（01336）連現兩支大陽燭，成交配合且重上250日線，表現優於中國人壽（02628）。今年首七個月，華保累計原保險保費收入同比微跌2.8%，相對大環境，可以收貨，而股價跑贏同業的另一原因，相信與主要股東增持有關。
事緣上海復星高科技在八月八日通過集中交易方式購買新華保險55萬股H股，此後復星系持股量增至5.01%。由於股價走勢上呈突破，加上有主要股東增持，不妨望多兩眼，華保上周五收報30.45元，短線較大阻力喺32至34元，回吐宜守29.2元。
司慕渢