絲絲講場：內地港股之神賺個開

由港交所贊助、騰訊（00700）同富途證券七月合辦咗個港股模擬投資大賽「尋找港股之神」，第一個月內地就有廿四萬人爭做「港股之神」。首月賽事已有結果，冠軍回報高達百分之一百零二，亞軍同季軍回報都有百分之九十九同百分之九十四！

模擬投資賽高手過招

唔單止回報驚人，睇埋投資策略仲驚人。冠軍喺比賽期間，全程只係炒一隻港股，就一個月「賺」百分之一百零二！係一隻內房股。邊隻？絲絲都想知。

亞軍初期重倉都係隻內房股，到賽程最後一日小量減倉，仲即日鮮炒咗一隻金融股，就咁一個月有百分之九十九回報！

季軍就靠高追熱門股。佢高位大手入咗隻建築股，喺下一個高位沽晒；之後又吼準內房，咁就「賺」到百分之九十四喇。

搞呢啲，無非等內地投資者熟悉香港市場，為深港通操練。深港通幾時通啫？

余絲韻