暴跌九成幾，然後升番一倍，其實一點也不特別，但是已經足夠令不少股民如癡如醉，炒到飛天。
細價股爆煲潮之初，散戶不會有特別損失，因為連年虧損，還要市值過百億，稍為有點財務知識也不會落疊，問題是見過兩蚊，跌到兩毫的話就一定大把人博，不是兩毫代表已安全抵買，而是純粹知道會有同道中人傻鬥傻。
香港二三線的市場，基本上已經變成擺地攤一樣，不惜工本開天索價，只為了製造暴跌跳水一刻的動力，令人錯覺有得博，所以搞到烏煙瘴氣都無人嘈，一句人各有志各取所需，就大家都當睇唔到，敷衍了事便算數。
整體上市公司質素低劣，除了中國經濟差，正頭正路難賺錢之外，股民及金融界低要求，亦是主要原因。我們對上市公司的期望，應該是價值創造的機器，而不是賭具。
細價股爆煲之後執死雞搞掂，是最容易學壞手勢的投資方法。年輕人本錢少，又要貪快，鍾情於這些膽博膽遊戲無可厚非，但問題是人始終要成長，有一日可能手上資金數以億元計，只是懂得欺凌牛頭角順嫂，無能力無膽識去打大佬，挑戰索羅斯，到時怎麼可能維持高回報。
香港股市的淪落，就是因為我們甘於只是做中國公司的股市，即使企業質素低落，只要有得賭的話，托價爆煲再炒過的循環生生不息便可以，作為投資者，要小心不要被同化。
豐盛金融資產管理董事 黃國英（作者為註冊持牌人士）