Market Insight：大笨象前景唔樂觀

今晚美國公布七月就業數據，預計新增非農職位17.1萬個，難估的是太強勢必重燃加息預期，可是太差亦唔着數，揭示環球最後一個經濟火車頭都死火，既然開大開細都難賭，不如索性趁周末前減磅，疊埋心水睇奧運開幕好過。

大笨象滙控（00005）派中期成績後，股價連挾兩日，昨再升2.7%，為一月中以來新高。業績半年少賺28.7%，稍勝預期，但長短期利率收窄，在銀行去槓桿大氣氛之下，睇唔到大笨象生意短期會有起色。今次刺激股價純粹出於意料之外的回購計劃，25億美元規模大約等於1.9%的股份。

金軟有勢追落後

滙控出售巴西業務後袋裏有錢，但作為一間資本實力相對充裕的跨國銀行，唔單止無集中火力在老本行放數收息，也放棄通街蔗渣價錢的金融資產收購機會，寧願選擇用來回購，在在反映，管理層計過度過都係買番自己股票着數，事件顯示股價淪落到50元水平的大笨象，中短期已跌到差不多。

但俗語有云：「銀行乃百業之母」，最先窺探經濟風向的賓架對環球經濟何許悲觀，今次真係畫公仔畫到出腸。

查實六月底英國公投後，全球股市忽然強勢，同復甦扯唔上半點關係，機會主義者純賭環球經濟陰雲密布，央行必然寧鬆莫緊，繼續放水，但實體經濟唔掂，尤其沒有金融業的加入，要嚟一次大牛市真係談何容易。

與其喺鬥低的PE中搵最低嗰隻嚟買，近期基金炒鬼的態度，就索性搵無數圍的資訊科技股，騰訊（00700）升到要高管查倉已係最佳例子。昨見第二梯隊好似網龍（00777）、金山軟件（03888）及中軟國際（00354）都幾好氣勢，其中金軟靜咗一排，相對仲喺低位可以留意。

「板塊追蹤」好幫手

最新推出「東網Money18」的「板塊追蹤」顯示，上文提及的軟件板塊升幅位列第六，上升1.67%，而全港獨有的「一帶一路」、「明星概念」及「AI/VR」板塊亦值得留意，當中不乏一啲強勢股，如舜宇光學（02382）。另古勝留意到昨日有多隻新能源股做好，如華能新能源（00958）升5.1%、龍源（00916）升4.7%、華電福新（00816）及金風（02208）均升近2%。

潔淨能源有國策支持，加上風電同光伏發電亦實施全額保障性收購，有助增加企業收入。華新能及華電福新早前均發盈喜，華新能在發電量及利用小時方面有所提升，預計中期多賺超過五成。

華電福新則預計中期純利增長超過兩成，主要是位於福建的水電項目及風電的發電量提升，帶動集團盈利。

至於龍源，上半年表現唔錯，首季純利增長3.6%，首六個月發電量按年增5.4%，集團將於下周二公布中期業績，昨日股價開始有動靜，不妨睇位小注跟進。

古勝