絲絲講場：滴滴老總都有A貨？

不幸嘅券商係內地國泰君安。話說內地最大Call車App「滴滴出行」收購Uber中國單大Deal周一公布，國泰君安周二即刻搞電話會議，仲請到「滴滴副總裁張總」嚟講吓併購詳情。

開電話會議似層層

「張總」喺電話會議度話，併購後會減乘客補貼，又話半年至一年內兩個App會合併。

嘩，講到要減乘客補貼咁大件事，媒體梗係大隻字報道啦。滴滴同日出嚟澄清，話佢哋副總裁張貝並冇參加過任何券商電話會議喎，電話會議入面嗰位係「冒牌」，滴滴仲嬲到報埋公安添。

呢鑊咁甘，國泰君安證券研究部周三即喺微信出聲明道歉，話佢哋委託第三方服務公司請「滴滴副總裁張總」參加電話會議，點知「張總」不單止唔係張貝，就連滴滴員工都唔係！

今回絲絲寄予無限同情，事關只要知道電話會議號碼同密碼，任何人都可以接入個會議，得聲冇樣，要確認是否真身，係有啲難度。

不過，絲絲最想知嗰位山寨老總到底係乜人，唔知有冇下文呢可？

余絲韻