絲絲講場：同樣炒Apple 股神鍊贏艾肯
「股神」巴菲特同有「股壇狙擊手」之稱嘅美國對沖基金大鱷艾肯（Carl Icahn），邊個勁啲？
Apple Inc.股價上周三收市創史上第二大單日升幅，升咗6.5%，係近3個月嘅高位，之後一直好硬淨，到周一早段再升多1%，破埋105美元。高手過招初步結果顯示，雖則大家都係買Apple，今個回合股神大勝狙擊手。
表面毁原則 實質賺錢
仲記得股神巴菲特嘅投資心法「唔熟唔食」？即係唔隨便投資唔熟嘅業務，所以股神咁多年都唔買科技股，皆因佢唔熟科技呢啲潮嘢。點知今年五月，股神旗艦巴郡忽然披露原來已經入咗980萬股Apple！
當時Apple股價不斷尋底，人人認為股神做壞自己規矩；依家睇番原來暗藏玄機，畀佢扑中Apple股價見底。股神一向偏好長揸，照五月持股計，上周三單單一日帳面估計賺咗6,160萬美元（約4.8億港元），果然證明佢嗰句「別人貪婪時要恐懼，別人恐懼時就要貪婪」使得！
同樣對住Apple股份，股壇狙擊手艾肯就喺四月尾，好有先見之明咁，公開話自己已經沽晒手頭上4,580萬股Apple。不過依家睇番，老友，可能沽早咗喎！
余絲韻