孖妹S檔案：直升機派錢經濟股市會點？

日偏保守 未必敢博

曾：美國維珍尼亞理工大學經濟系副教授 曾國平

彩兒：伯南克四月時喺自己個Blog度，分析聯儲局推行「直升機派錢」嘅可行性，之後有大人物談論呢樣嘢，聯儲局主席耶倫話，「直升機派錢」會係極端情況下嘅選擇，「債王」格羅斯話，措施可解決新生代就業危機。伯南克七月中去日本同當地官員講「直升機派錢」，就更令市場憧憬發生嘅可能性。

Kitty：其實「直升機派錢」即係咩？如果日本真係有錢從天而降，咁我每年飛多幾轉日本，都唔使驚買唔到樓啦。

曾：原本「直升機派錢」呢個概念同政策或者點樣拯救經濟係完全冇關，話說喺一九六九年，經濟學家佛利民（Milton Friedman）寫咗篇文，嗰篇文非常學術性，講咗個好抽象嘅世界，佢問嘅問題係，幻想有架直升機飛過派錢，畀每個人去搶，到底會發生咩事。佢嘅答案係派多一倍錢，所有物價最尾會升多一倍，之後提出最佳嘅貨幣政策應該係點。

曾國平表示，伯南克所指的那種「直升機派錢」出現機會不大。	王弼認為，市面上優質股不多，如內地公路股、房託基金，派息及生意穩定。	日經年內反覆

彩兒：咁耐之前嘅嘢，最近又會畀人攞番出嚟講嘅？

曾：過去幾十年，學術界以外其實都冇咩人提「直升機派錢」呢個概念，直到伯南克喺二○○二年講開日本通縮問題，喺一篇演講詞提出解決方法，用咗「直升機派錢」呢個詞彙，我覺得伯南克只不過係用咗呢個名做包裝。

作用短癮 如永久QE

一般情況下，央行同財政部門各自獨立運作，伯南克口中嘅「直升機派錢」，係央行同財政部門合作，財政部門大幅減稅、增加政府開支，同時央行直接買咗財政部門發嘅債，永遠唔賣出，咁即係政府要使錢，由央行直接印出嚟。

Kitty：咁做法真係可以刺激經濟？

曾：若單單睇刺激通脹，一定有效，因依家實施嘅量寬（QE），央行強調只係暫時性措施，喺市場買返嚟嘅債，始終會賣出，但「直升機派錢」係央行買咗嘅債會消失咗，而增加咗貨幣供應，可以話係QE嘅永久版本。

不過，我就覺得未必一定可以刺激實體經濟，印銀紙只係刺激需求，另一邊係供應問題，好似點樣解決生產力低等。其實以前打仗、有咩天災人禍，都會用到咁嘅方法，最近例子有津巴布韋。

通脹倘失控難收科

彩兒：日本由二○一三年推出QE以來，日股升咗近三成，若做埋「直升機派錢」，又會唔會長升長有？

曾：短期對股市一定好，效果會比QE勁，問題係令通脹失控嘅話，會好大件事。

Kitty：日本央行行長黑田東彥早前向憧憬「直升機派錢」嘅人大潑冷水，重申唔會推行呢個措施。之不過，日本推行咗QE都好幾年，年初實行埋負利率，經濟都冇咩起色，央行啱啱議息後，宣布維持QE規模不變，但就增加咗購買ETF同美元貸款計劃嘅規模。你肯定日本真係唔會做「直升機派錢」？

曾：我覺得伯南克所講嗰種「直升機派錢」出現機會唔大，一來法律係禁止央行咁做，即使法律容許，咁做對通脹嘅影響冇人會預計到，有機會令通脹急升。日本通縮已持續咗十幾、二十年，但若唔好彩，整咗個十幾、二十個百分點嘅通脹，會好大鑊，央行一般傾向保守。

第二係日本通脹仲係負數，其實對持有好多日圓嘅有錢人有利，政府大幅增加通脹，需要面對一定壓力。

不過，政府會唔會暗中做緊，又扮到唔係呢，我覺得會，比如日本首相安倍晉三啱啱就宣布推出28萬億日圓經濟刺激措施，當中有13萬億日圓嘅財政刺激措施。

貧富懸殊愈拉愈闊

王：專業投資者 王弼

彩兒：你又信唔信喺我哋有生之年，會見到央行實行「直升機派錢」呢個咁大嘅實驗？

王：我覺得環球央行會朝呢個方向發展，為刺激經濟係要嚟講嘅啫，最主要係因為政府欠債太多，依家好多政府根本年年財赤，債券到期就發新債去填舊債，如果唔係靠央行吸納，市場根本唔會有咁多錢去買，息率自然會高。

Kitty：央行不斷印咁多銀紙，對我哋會有咩影響？

王：央行做咗QE咁多年，都睇到有咩影響啦，有錢、有資產嗰班會更加有錢，拉闊貧富懸殊、引起政治動盪，好似美國就有特朗普咁瘋狂嘅總統候選人出咗嚟。股票、債價、樓價係咁升，我睇呢個係一個貨幣現象，係貨幣愈來愈唔值錢，如果央行繼續印錢，呢個情況應該會繼續出現。

揸美強勢股助避險

彩兒：咁講法，我哋好似揸番啲資產有着數喎。

王：咁都要睇吓咩資產，大型嘅上市公司，好似美國嘅跨國企業應該會繼續被炒起，香港、上海、深圳、溫哥華、倫敦、悉尼及紐約呢啲一線城市嘅住宅都會升。我哋依家個環境會係強者愈強，比如港鐵（00066）、領展（00823）呢啲股份會一路有人買落去，但債務纏身嗰啲公司，即使繼續泵水，對佢哋都冇咩幫助。

Kitty：你依家揀股同債，又會點揀法？

王：優質股唔多，香港都係嗰十隻八隻，如內地嘅公路股、房託基金呢啲派息同生意穩定嘅公司。強者愈強嗰類公司，美國較多，穩定派息嘅跨國企業，如可口可樂（美股：KO）呢啲食品公司，雖股價已好貴，但應可續企穩。

另外，我覺得只要將實體貨幣虛擬化，即使實行負利率，啲人都冇辦法將錢攞出嚟，令銀行體系受衝擊，要做到呢啲嘢就要加強電子支付，VISA（V）、MasterCard（MA）、PayPal（PYPL）呢類公司應該可以得益。

王：債券個息率真係好低，年頭我買美國十年期國債仲有兩厘幾息，依家就得番約1.5厘，我仲會再加注，係因為歐洲國債都係零息，我相信美國之後唔太加到息，國債息率會好似歐洲咁愈來愈低息。

買實金及ETF看門口

彩兒：我聽講你仲收埋唔少黃金，覺得揸番啲先有安全感？

王：我覺得黃金係要買，呢樣係依家最抵買嘅資產，我相信遲早會再升。一百年前某個國家發嘅貨幣，到今日可能已變廢紙，但有個講法係，一安士黃金永遠買到一套唔錯嘅西裝。我覺得黃金要佔整個資產組合5至10%，可以定期買，如每三個月買一両實金，另一個做法係買金礦股ETF（交易所買賣基金）。

若有料報畀彩兒同Kitty或有嘢問，可電郵money.biz@on.cc

彩兒、Kitty