期指大戶果然托多一日都唔想，周末假期前夕，加上七月期指已成功高位收割，上周五市況即市逆轉，周四晚恒指夜期，收市一刻美股低位拗腰唔跟，依舊過萬張成交低收，其實已初見市況氣氛轉變之端倪，結果上周五恒指一穿10日線之後，限價盤湧出，結果期指日市要隊到117點低水收，好友一瞬間變得無險可守。
上周五恒指收報21,891點，跌282點，整個「翻身月」則累積升1,097點。其實午市前買盤都嘗試穩住指數企在10日線附近，但時間上臨近周末假期，加上期指好友早於周四飽食遠颺，鳴金收兵去，打擊短期氣氛。
結果午後恒指跌穿支持後，幾乎未見過好友較有力的反撲。上周按計劃在指數破位追八月淡倉，成本價21,990點，半數以收市價食胡，筆者保留細注睇多日，若恒指守住21,654點，可能只係超短線修正，否則至少見21,292點。
John Mullen