Market Insight：軟件股回調可上車

上星期港股是應回不回，日央行行長黑田東彥否定會引用聯儲局前主席伯南克絕技「直升機撒錢」，聯儲局見英國公投後，金融市場反應雷聲大雨點小，議息後聲明都無咁重鴿味，繼續為隨時作第二次加息打晒開口牌，港股居然如老僧入定，若非期指大戶力托，頂到周四結算，個市斷估在周中應該已經開始回吐，唔會谷埋上周五一鋪過，連條10日線都穿埋。

手遊股熱度難持久

睇番上周五個市氣氛都幾差，早一日率先有莊家股自爆，牽連多隻股仔跌幅超過兩成，包括周四隊到爆廠隻工蓋（01421），再跌35%，真係杰撻撻。此外，近排汽車股都算牛氣沖天，上周唔少見創近期新高後回吐，美銀美林話收到風七月乘用車銷售熱爆，按年勁升三成六都頂唔住，最甘係華晨（01114）跌6.1%收市，僅得長汽（02333）畀瑞信品題唱好，仲可升住收市。

強勢股回頭，還有股騰訊（00700），上周五先升到189.8元新高後倒跌，陰陽燭圖呈穿頭破腳轉勢信號，確實濕滯，今日忌跌。近排騰訊消息多多，先係《Pokemon GO》熱爆，牽動手遊股估值，轉頭高管見股價升到咁竟要求查倉。

如果純綷因為《Pokemon GO》高追騰訊，恐怕大家真係唔打機，表錯情。騰訊手遊的研發能力，在行內唔算十分出色，否則都唔使天價花86億美金，走去買芬蘭Supercell幫佢開發遊戲。況且今次平地一聲雷，集AR與電子地圖技術大成，《Pokemon GO》廣受歡迎，任天堂都話好睇唔好食，在日本股價幾日間跌返三分之一，說明遊戲同遊戲股一樣，熱度嚟得快去得快，長遠唔易維持高估值。

喺香港上市的科網股，除咗騰訊近排勢頭勁之外，中小型科網股開始有啲郁動。上周四金蝶國際（00268）公布，旗下金蝶中國終止關於前海百遞及雲之家的合約安排，而根據交易文件，集團將收取約1億元人仔的代價。

中軟擎天走勢改善

同時，集團宣布出售上海金蝶醫療全部股權，涉及842.3萬元人仔。野村就此發表報告，指金蝶將出售三個虧損業務，可專注發展ERP業務，相信有助改善盈利，將其目標價上調至3.6元，評級升至「買入」。

另外，中軟國際（00354）同中國擎天軟件（01297）走勢均見改善。

中軟上周四呈大陽燭上升，守3元之上，後市可反覆上試3.2元阻力。擎天軟件股價在三月中起動，六月曾升至4.74元，上周跌至4.05元現承接，短期內若重上20日及50日線4.3元，有勢挑戰六月高位。

古勝