港股昨日重推收市競價時段，暫時一切順利，未見到有異樣。反而，昨日《Pokémon GO》突然在兩大智能系統上架供客戶下載，全城都在捉「小精靈」，冷落了魚缸，就連廣深老友都來電說要來港玩玩，點解推出呢個遊戲初期任天堂股價會有咁大反應，如今當真領教！
深交所昨日表示，要落實從嚴監管，着力遏制違規減持行為，全力維護市場秩序，並加大異常交易行為監管力度，圍繞「重點帳戶、重點行為、重點股票及重點時段」四個關鍵重點，來強化對市場交易和系統性風險的實時盯盤和預警監察。似乎在深港通開通前，深圳股市要來一次「犂庭掃穴」。呢件係好事，以免一通車外資就中伏，咁就唔通好過通。
事實上，去年救市一役，充分暴露A股市場發展尚處相對初階，要撥亂反正，A股要有一、兩年「水清無魚」的淡靜期，但為着市場對外開放及長遠健康發展，還是十分值得。
回說個股，昨日見安徽海螺水泥（00914）股價表現不俗，高位見20.95元，收報20.85元，升3.22%，成交有4.42億元，股價成功重上250日線收市，為去年六月以來首見。
最近投行大摩調高了水泥股目標價，以反映下半年大部分水泥企業業績將會有所改善，並建議增持海螺及中國建材（03323），講白點道理就係炒復甦揀龍頭咁簡單！觀海螺股價走勢剛呈突破，短線整固若能企穩20元關樓上，是浪目標反覆向23元進發。
順帶一提AR遊戲熱，有利騰訊（00700）股價創新高，相信季內見200元應無懸念，嫌正股太大價可考慮認股證，如騰訊高盛購（21003），十二月到期，行使價200元，實際槓桿9倍。
司慕渢