絲絲講場：財金界捉精靈玩轉中環

新世代股評人大鬥法

既然個市無乜斬獲，不如睇下財經界捉小精靈有咩斬獲。中上環、金鐘、灣仔商業區出沒嘅精靈，無一百都有幾十隻。大中華投資策略研究學會副會長（港股）李偉傑（Jason），以及財經評論員黃志陽都喺中環中心返工，佢哋收穫幾乎係財經界最豐富！

沈大師試玩捉到9隻

Jason尋日收市前玩咗大半日，佢話只係坐喺Office守株待兔，已經捉到幾十隻。

黃志陽都唔輸蝕，玩咗半日都有35隻，當中比較受歡迎嘅車厘龜、奇異種子、小火龍、傻鴨、比比鳥（唔係周柏豪）進化前嘅波波等都有，認真犀利！可惜仲未捉到人見人愛嘅比卡超。

之但係尋日個市有上有落，精靈訓練員實力都有高有低嘅。沈振盈沈大師直播試玩，到最後都只係捉到9隻。唔……咁真係要繼續努力喇。

銀行商場全部變熱點

去中環捉精靈又點少得銀行？最多精靈出沒嘅係恒生總行，有鴨嘴火龍、大口蝠及小磁怪等等，雖然唔稀有但勝在品種夠多。中銀香港（02388）同渣打香港就最差，行嚟行去都只係見到啲綠毛蟲、蘑菇蟲，吸引力認真麻麻。

唔少小精靈尋日「亂入」各大商場，新地（00016）同信和（00083）旗下商場，仲話考慮會同《Pokémon GO》合作，畀啲稀有小精靈大家捉咁話。既然熱潮擋唔住，絲絲喺到奉勸大家一句，捉小精靈時記得睇路同睇車呀！

余絲韻