絲絲講場：乜嘢人會有30幾個MPF戶口？

行內疑神秘顧客探行情

話說積金局機構事務總監及執行董事鄭恩賜尋日喺論壇講起，見過有人有30幾個MPF帳戶，仲Join晒大部分市面上嘅MPF計劃，令在場人士即刻O晒嘴，鄭生即刻強調，呢個係真實個案嚟（口架）！

之但係嗰位仁兄，做咩無啦啦揹住咁多個MPF帳戶呢？鄭生就講笑咁話，有可能係行內人士做「神秘顧客」，Join晒同業嘅計劃，體驗對方服務，知己知彼咁話。業界人士就估計，最大可能性係嗰位仁兄，過去打過太多份工，又唔識做整合，所以每次打新工都有新帳戶，累積起來就多成咁喎。

其實睇積金局數據，截至今年二月底，強積金個人帳戶數目增至近520萬個，意味香港每位打工仔平均擁有多過一個MPF帳戶，所以唔止嗰位有成30幾個帳戶咁多嘅仁兄，其餘打工仔都要適當咁整合下。

提及呢排市場關注「預設投資策略」，鄭生話當局仲未訂立確實推出日子，但目標係出年上半年，又透露當局搞緊「積金易」電子平台。

余絲韻